पुण्यातला मराठी ब्लॉगर्स स्नेहमेळावा: वृत्तांत

शेवटी मी आणि भुंगाने जी चर्चा केली होती आणि ब्लॉगवर मतदान घेतले होते ती ब्लॉगमीट सुरेश पेठे काका आणि अनिकेत समुद्रच्या भरीव कामाने फळास आली. त्यात विक्रांत देशमुखचा पण सिंहाचा वाटा. आणि तुम्हां सर्व ब्लॉगर्सचाही. पेठे काकांनी पोस्ट टाकल्यावर जिथे आम्ही ८-१० लोक येतील अशी अपेक्षा ठेवली होती तिथे साधारण पन्नास लोकांनी आपली उपस्थिती कळवली. आता एवढे लोक येणार म्हटल्यावर काही तरी तयारी तर पाहिजे ना. म्हणून मग आम्ही मेलामेली चालू केली आणि एकत्रित प्रयत्नांतून लोकसता (मुंबई आवृत्ती), इ-सकाळ, (मुद्रित) सकाळ (आणि अशा अजून काही) वृत्तपत्रांतून प्रसिद्धी मिळाली. या बातम्यांचा पण मेळाव्याला खूप फायदा झाला. त्याबद्दल लोकसत्ताची टीम, सकाळमधून संग्राम फडणीस आणि टीम, मिररचे नितीन आणि आम्हांला ज्यांनी ही बातमी मराठी जनांपर्यंत पोचवण्यास मदत केली त्यांचे "मराठी मंडळी ब्लॉगर्स संघ"(?) तर्फे हार्दिक आभार. त्याचबरोबर ’स्टारमाझा’कडून प्रसन्न जोशी, त्यांचे सहकारी योगेश (हिंदुस्तान टाईम्स) यांचेही आभार.

आता या मेळाव्याच्या बातमीच्या निमित्ताने आम्ही समस्त ज्ञात-अज्ञात ब्लॉगलेखक-वाचकांच्या अपेक्षा आधीच वाढवून ठेवल्या असल्याकारणाने त्याची तयारी करणे आलेच. निदान काहीतरी कच्ची कार्यक्रमपत्रिका आणि मसुदा तरी हवाच या विचाराने आम्ही मध्यवर्ती ठिकाणी आदल्या दिवशी म्हणजे शनिवारी भेटायचे ठरवले. बालगंधर्वचे उपाहारगृहाची जागा निवडली. आम्ही मेलवर अगदी गप्पा मारत असलो तरी प्रत्यक्षात प्रथमच भेटत होतो. अनिकेत नेहमीप्रमाणे त्याच्या सायकलवर (आणि त्या वेषात) आला. भुंगाला तर मी पाहिल्यावर माझी पहिली प्रतिक्रिया होती, "अबब...!!! अरे... केवढा आहेस तू?" पेठे काका आणि विक्रांतला नमस्कार झाल्यावर आम्ही बसून कार्यक्रमनिश्चिती केली. आणि ’द डे’ला थोडे लवकर म्हणजे साडेतीनला भेटायचे नक्की केले.

सकाळपासून माझी कामं उरकत, धावपळ करत कसाबसा मी चुरगाळलेला झब्बा घालून उद्यानात पोचलो. अनिकेत आणि भुंगा (दिपक) आलेच होते. गार्डने थोडी वाट पहायला लावली. त्याचा सरकारी खाक्या "४:०० शिवाय गेट नाही उघडणार." मग बाकी मंडळी पण हळूहळू येऊन पोचली. आणि आम्ही आत प्रवेशते झालो. आधीच अनिकेतने पुणेरी सूचना देऊन ठेवल्यामुळे आपापले तिकीट काढले प्रत्येकाने :-) .

उद्यान नेहमीप्रमाणे सुंदर आणि स्वच्छ होतेच. पण आता त्या मोठ्या झोपडीवर एकदम तीस लोकांचा हल्ला पाहून तिथे आराम करत असलेले सुरक्षा रक्षक तिथून "कलटी" झाले आणि झोपडीवर आम्ही ताबा मिळवला. त्यात कुठून तरी काहीतरी पेटवल्याने धूर निघाला आणि धूर आणि प्रकाशाचा खेळ पाहून माझ्यातला कॅमेरा जागा झाला.

साडेचारपर्यंत वाट पाहून एकदम पुणेरी वेळेत म्हणजे ४:३१ ला कार्यक्रम सुरु केला. प्रत्येकाने एका रजिस्टरवर आपले नाव आणि ब्लॉगची ओळख करुन दिली. त्याचा उपयोग आपण ब्लॉगर्स जे व्यासपीठ तयार करत आहोत त्या कामी एक माहितीसाठा म्हणून केला जाईल. अनिकेतने प्रथम आमची ओळख करुन दिली आणि पेठे काकांनी प्रास्ताविक केले. या मेळाव्याचा उद्देश जाहीर केला. त्यानंतर प्रसन्न जोशी आणि त्यांचे ’माध्यमाईट्स’च्या सहकाऱ्यांनी (योगेश आणि नितीन) मनोगत व्यक्त केले आणि या ब्लॉगसाहित्याला मराठी साहित्य विश्वात स्थान मिळवून देण्यासाठीची कळकळ व्यक्त केली. हे सर्व अपडेट्स मी SMS द्वारे आणि प्रभास ट्वीटरवरुन देत होतो.

आता प्रत्येक ब्लॉगर आपल्या ब्लॉगची थोडक्यात ओळख आणि खरे नाव सांगत होता. नेहमी भुंगा, एक अनामिक, बेदुंध, भटकंती अशा नावाने ओळखणारे आम्ही आता खरे नाव माहीत करुन घेत होतो. एकदम मज्जा मज्जा :-) त्यानंतर एक अनौपचारिक चर्चांचे सत्र रंगले. जो तो आपापला आवडता ब्लॉगलेखक शोधून त्याच्याशी बोलून ब्लॉगची प्रशंसा करत होता. प्रशंसा मिळवण्यात भुंगा, अनिकेत आघाडीवर होते. काहींनी ज्या काही टेक्निकल शंका उपस्थित केल्या त्यांचेही निराकरण तज्ञांनी केले. ब्लॉग डिझाइन आणि टेंप्लेटबद्दल भुंगा, भटकंतीबद्दल मी, पुणेरी सूचनांसाठी मी अशा अनेक लोकांशी लोक बोलायला उत्सुक दिसले. आता माझ्याशी बोलून त्यांच्या ज्ञानात काय भर पडणार होती ते त्यांनाच ठाऊक. असो. पण एकदम मजा आली. राजा शिवाजी.कॉमच्या मिलिंद वेर्लेकरांशी पण खूप दिवसानंतर भेट झाली. एकंदर ही मीट फारच फलदायी ठरली. मेळाव्यादरम्यान आणि मेळाव्याच्या शेवटी ज्या काही गप्पा झाल्या त्यात प्रमुख खालील मुद्दे चर्चिले गेले.

• मराठी ब्लॉगर्सना एकत्र आणणे कसे गरजेचे आहे?
• त्यासाठी काय करावे लागेल? एक ग्रुप स्थापन केला जावा.
• ब्लॉगचोरी रोखण्यासाठी काय करता येईल?
  
• मराठी ब्लॉगर्सच्या मदतीसाठी एक ऑनलाईन फोरम (चर्चासत्र) चालू करण्याचा विचार आहे. तावर आम्ही काम करत आहोत. तत्संबंधी लवकरच आम्ही माहिती जाहीर करु.
• साहित्य संमेलनाच्या अध्यक्षीय भाषणात ब्लॉग या साहित्यप्रकाराचा ऊहापोह व्हावा अशा अर्थाचा ठराव संमत केला गेला. आणि त्याची प्रत लवकरच नवनिर्वाचित अध्यक्ष डॉ. द.भि. कुलकर्णी यांच्याकडे सुपुर्द करण्यात येईल.
• यंदाच्या साहित्य संमेलनात मराठी ब्लॉगर्सतर्फे एक स्टॉल उभारण्यात यावा.
  
• या उपक्रमाची माहिती पत्रकार विश्वाला व्हावी म्हणून एक पत्रकार परिषद आयोजित केली जावी.

खरे तर माझे काम फक्त फोटो दाखवण्याचे होते. पण केला थोडा आगाऊपणा. अधिक माहिती अनिकेतने दिली आहेच. तर मग आता फोटो पण पाहा.

 

खरंच आजच्या मेळाव्याला लक्षणीय प्रतिसाद लाभला. पन्नास साठ लोक आणि ते पण पहिल्याच मेळाव्याला म्हणजे पदार्पणातच सेंच्युरी मारल्यासारखे आहे. पुणे, मुंबई, फलटण अशा अनेक ठिकाणांहून ब्लॉगलेखकांनी तर हजेरी लावलच. पण ज्यांचा ब्लॉग नाहीये पण सुरु करायचा आहे किंवा नियमित वाचक आहेत अशांनीही आजचा "दीस गोड केला". विक्रांतच्या म्हणण्याप्रमाणे मराठी ब्लॉगिंगच्या इतिहासात नोंद व्हावी असा हा दिवस होता. पहिला-वहिला ब्लॉगर्स स्नेहमेळावा एवढ्या मोठ्या प्रमाणात साजरा झाला. हीच भावी उज्ज्वल मराठी ब्लॉगयुगाची नांदी म्हणायला हरकत नाही.

शेवटी आयोजकांची काही चर्चा झाली (येईल येईल, लवकरच बाहेर येईल), ठरावाचा मसुदा तयार झाला, आणि पुढील वाटचालीची दिशा ठरवून मी घराकडे जायला बाईकला टांग मारली (इ-सकाळची ताजी बातमी वाचण्यासाठी)...!!!

आज डीएनए ला पण बातमी आली.

अवांतर: पेठे काकांनी तिळगूळ आणि कुणीतरी महिला मंडळाकडून तिळाच्या वड्या आल्या होत्या. मला फक्त दोन(च) वड्या मिळाल्या. आणखी मिळतील का हो?